නුඹේ වූ මගේ කඳුළු

සුසුමක්ව හෙලනු බැරි ලතැවිල්ල

කඳුලක්ව නොගලනා වේදනා

කවියක්ව ඇවිදින් නුඹේ සිත ළඟ

හමා යන ඒ සුසුම්

ගලා යන ඒ කඳුළු.

නුඹේ නොවේ මගේ මැයි.

වරණ

තණ්හා රඟයි රතී හා රඟා සමගින්
නිවී දිලිසෙන බුබුළු අතරින්
කිරුළ මා ලඟය 
අභිසෙක් කරන්නට රැජිනියක්

වසා සුදු රෙද්දකින් බුලත්කොළ හෙප්පුවක්
පෝලිමට එති උත්තරාවෝ
යතුර මා ලඟය
සිරකරන්නට ඉන් එකෙක්

අඩ අඳුරේ මගේ දොර ළඟ
සෙවණැලි සදයි සිරිමා සමග අම්බපාලිය
මුදල මා ලඟය
මිලදී ගන්නට සිතක්

සුදු ඇදන් උත්තරා හා කතුන් සමගින්
මගේ දරුවන් සිටී කුඩුව ලඟ
කඩුව උඹ ලඟය
සිදීන්නට මගේ ගෙල

භාවනාව

සුදු කොලය මත
වැටුන කළු තිත
විසල් වී
කළු වළාවක් සේ
දකිමි නොදැක ම
එක සුදු තිතක්
 
කළුවර නුඹකුසේ
නිවී දිලිසෙන
බොහෝ තරු මැද
දකිමි එක තරුවක්
නොදක කළුවර බිඳක්
 
ගෙමිදුලේ පිපි වැනෙනා
බොහෝ මල්පොකුරු මැද
දකිමි එක රතු මලක්
නොදැක නෙක වර්ණයන්
 
වේදිකාවේ සමුහය මැද
ගී ගයන නුඹේ හඬ
අසමි නොඇසී
අන් හඬක්
 
ආනා පාන
දහසක් සුසුම් මැද
එක හුස්මක්
ගැන සිතන්නට
වඩමි මම බවුන්
 

සත්‍යයේ සත්‍යය

සත්‍යයේ සත්‍යය
*****************
නුඹ නොදකින
මා දකින සත්‍යය
නුඹ එලෙසම
මා ගැනද
දකින බව දනිමි.
ඒ බව දත් නුඹට
ගරු කරමි.
නොදත් නුඹ
දිනක එය දකින විට
සතුටුවෙමි.

අමතකවුන පරණ ලිපියක් යහ පාලනය සහ මෛත්‍රී පාලනය 2015-01-10-09-42-48

යහ පාලනය සහ මෛත්‍රී පාලනය - රංජිත් වීරසිංහ

මෛත්‍රීපාල සිරිසේන මහතා අද ශ්‍රී ලංකාවේ විධායක බල සහිත ජනාධිපතිය. ඔහුගේ මැතිවරණ ව්‍යාපාරය තේමා කරගත්තේ  “රටකට ඕනෑ මෛත්‍රී යුගයක්’ යන ආකර්ශනීය පාඨයය. සැබවින්ම එය ශ්‍රී ලාංකිකයන් ට ආමන්ත්‍රණය කිරීමට සුදුසු හා ගැලපෙන නිර්මාණයකි. බුදුදහමට අනුව තමන් වෛර නොකරන්නකු බව මෛත්‍රීපාල සිරිසේන මහතා නිරන්තරයෙන්ම ප්‍රකාශ කලේ ධම්ම පදයේ එන “නහී වේරේන.... ''යන ගාථා පාඨය  උපුටා දක්වමිනි. තමාගේ නම ඡන්දදායකන්ට සිහිපත් කරන අතරම, ඔහුගේ මැතිවරණ පණිවිඩයද ඒ තුලම ගැබ් කළ ‘රටකට ඕනෑ මෛත්‍රී යුගයක්’ ජනතා සිත්සතන් තුළ සෙමෙන් කිදාබසිමින් පවතී. දැන් මැතිවරණය අවසන්ය. අප ජනාධිපතිගේ නම මන්ත්‍රයක් මෙන් මැතිරීමට අවශ්‍යතාවයක් තවදුරටත් නැත, සියළු ශ්‍රී ලංකිකයෝ එය දනිති. එහෙත් රටකට ඕනෑ මෛත්‍රී යුගයක් යන්න අමතක වීමට ඉඩ නොහැරිය යුතුය.

ස්වකිය නාමය නිසා උපන් මෙම වචනය බුදුදහමේ එන මෛත්‍රීය යන්නට සීමාකර ඉදිරියේදී රට පාලනය පටුසිමාවකට කොටුකිරිම ට අවස්ථාවාදීන් මාන බලන බවට දැනටමත් ඉගි පහලවෙමින් ඇත. මෛත්‍රී යුගයක් යන්නෙන් අදහස්‌ කලේ කුමක්දැයි දේශපාලන අර්ථයෙන් විග්‍රහ කරගත යුතුව ඇත. මෛත්‍රීපාල සිරිසේන නම් විධායක ජනාධිපතිට, තම තනතුරට අනුව ජනාධිපති කෙනක් වශයෙන් මෛත්‍රීය පෙන්නුම් කල හැකි අවස්ථා මොනවාදැයි සොයා දැනගැනීමට අපට ආණ්ඩුක්‍රමව්‍යවස්ථාව පරිශීලනය කළහැක. ඔහුට හිරකරුවන්ට මෛත්‍රීයපා නිදහස් කළ හැකිය. එහෙත් ඔහුට නීතිපතිට හෝ අධිකරණය ට අණදීමට හැකියැයි කියවෙන වගන්ති අප ආණ්ඩුක්‍රමව්‍යවස්ථාවේ තිබෙන බවක් දක්නට නැත. ඔහුට හමුදාවට හා පොලිසියට අණදිය හැක. අපරාධකරුවන් නීතියේ රැහැනට අසුකර ගැනීමට මුලික වන්නේ පොලිසියයි. අපරාධකරුවන් හෝ තෝරාගත් අපරාධකරුවන් අසුකරගැනීම සිදුකරන පරීක්ෂණ නවතා දමන්නැයි කියා ජනාධිපතිට පොලිසියට අණකල හැකිද?. එසේ කළ හොත් එය මෛත්‍රී පාලනයක් වේද?

මෙම මැතිවරණයට පෙරාතුවම මාදොළුවාවේ සෝභිත ස්වාමින් වහන්සේ ප්‍රමුඛ බොහෝ මානවහිමිකම් ක්‍රියාධරයන් යහපාලනයක අවශ්‍යතාව ගැන කරුණු ඉස්මතු කරනලදී. යහපාලනය හා මෛත්‍රී පාලනය අන්‍යෝන්‍ය වශයෙන් බහිෂ්කරණය වු ක්‍රියාවලි දෙකක් නොවී යහපාලනය මෛත්‍රී පාලනය තුලින් අර්ථවත් වියයුතුය. යහපාලනයට මග අවුරණ කිසිම ක්‍රියාවක් මෛත්‍රීයන වචනයට සිමාවි හෝ මුවාවී නොකළ යුතුය.

අද අප රටේ බොහෝ අපරාධකරුවෝ නිදැල්ලේ සිටිති. සමහර අපරාධ සිදුවෙන ආකාරය රුපවාහිනී තිරය තුලින් අපි සජීවීව දුටිමු. උසාවියෙන් වරෙන්තු නිකුත් කර ඇති පුද්ගලයන් පොලිසිය සමග ප්‍රසිද්ධියේ  සිටිනු අපි දැක ඇත්තෙමු. මේවා යහපාලනය ඇති රටක දැකිය නොහැකි කරුණුය. අපරාධකරුවන් ඔවුන්ගේ තරාතිරම නොබලා නීතිය ඉදිරියට පැමිණ වීම යහපාලනයකට මුලපිරිමකි.

ජනාධිපති මෛත්‍රීපාල සිරිසේන මුහුණදෙන මුලික හා බැරෑරුම් අභියෝගය ආණ්ඩුක්‍රම ව්‍යවස්ථා සංශෝධනයට අවශ්‍යය තුනෙන් දෙකක පාර්ලිමේන්තු බහුතරය ලබා ගැනීමයි. දූෂිත පාලන ක්‍රමයකට පුහුණු කරන ලද බොහෝ පාර්ලිමේන්තු මන්ත්‍රීවරුන්‌ට සිය පදවිය නීතියේ සහ සදාචාරයේ සිමා නොතකන ධනය උපයගැනිමට කේවල් කළ හැකි වෙළද භාණ්ඩයකි. මෙවන් මන්ත්‍රීවරුන් සිය ආණ්ඩුවේව්‍යවස්ථා සංශෝධනයට කැමති කර ගැනීමට ගෙවිය යුතු මිල යහ පාලනය විකුණා ලබාගෙන එයට මෛත්‍රී ලේබලය ඇලවිම නොකලයුත්තක් මෙන්ම නොසිදුවිය යුත්තකි .

පෙරමග.....

ආ මග....
දිගය
දුරය
දුෂ්කරය
කටුකය
මිහිරිය
පෙරමග.....
කෙටිය
නොදනිමි වෙන කිසිත්.

නුඹට නැති නුඹ

නුඹ කෙතේ අස්වැදී

නුඹ පැලේ නොඉදෙනා

බත ඉදෙන මැදුර මුල

ඉඳුල් අයදින නුඹ

නුඹ අතේ කරගැට

තලා  සැදු මාවාතේ

ඉගිලෙනා කුලුහරකන්ට

කානුවේ සිට අත වනන නුඹ

කරෙන් ඔසවා ගොසින්

උඩින් තැබූ මහතුඟක් ලඟ

දනින් වැටී ඉහලයන

සිහිනයක නිදියනා නුඹ

නුඹේ සිප් කිරි උරා බිවු

මුසිලගෙ තාලයට

බොරු පද වයන්නට

සිල්ප අමතක කරන නුඹ

මොක්පුරය දැකගන්න

කෝටියක් සිල් පුරා

දෙවුදත්ගෙ බණ අසා 

නිරය ලඟ සිටින නුඹ